政壇：龍系勞斯萊斯專銷內地
想知世界邊度最多富豪？唔一定靠睇福布斯，參考勞斯萊斯指數（Rolls-Royce Index）一樣得。顧名思義，指數會反映邊個國家最多人買勞斯萊斯。
舊年中國就超越美國，成為指數排名世界第一嘅國家。今年係龍年，生產商為向中國呢個大客致敬，即將推出「龍年」系列車型，車入面嘅皮枕會人手繡上龍形圖案。太浮誇？見仁見智啦，但標價就認真誇張嘞，開價一千二百幾萬港元。但中國人一向鍾意炫富，相信唔少富戶都樂於買嚟顯示一下自己有幾多財富。
根據從事奢侈品業務嘅耀萊集團講，佢哋唔少客人都係非常年輕嘅超級富豪，一係由父母贈送，唔係就繼承遺產，都唔係靠自己創業賺番嚟。佢哋咪即係內地好興講嘅「富二代」？