政壇：發叔女婿棄選離島區會

喺選前是非滿天飛嘅離島同沙田兩個區議會，尋日分別順利選出南丫南鄉委會主席周玉堂，以及公民力量何厚祥出任新主席。離島區議會之所以惹人注目，全因選前傳出新界鄉議局主席劉皇發個女婿委任議員余漢坤，有意染指主席一職，但尋日結果係佢冇出嚟競爭。

余漢坤點解唔選？外間無從得知。有一個說法，係佢知道同周玉堂支持度相若，即使邊個勝出都只會係慘勝，為免令人覺得鄉議局搞內訌，所以就退出呢次競爭。亦有一說，指呢幾日唔少鄉議局中人都先後致電勸佢以和為貴，由於抵受唔住周遭壓力，所以自行退選。

無論係乜原因都好，余漢坤今次都係明智之舉。發叔想捧余漢坤接替佢喺鄉議局嘅位置，一直以嚟對佢提攜有加，可謂路人皆見，如果佢今次堅決參選，結果落得嘈交收場，咁對佢嘅前途都不無影響。塞翁失馬，焉知非福，政治一日都嫌長，今日退一步，或者將來可以跨進一大步呢！