政壇：司徒華書房移贈港大
支聯會創會主席司徒華逝世一周年，華叔家人遵照佢嘅遺願，將個人藏書同書信檔全數完整保留，仲將其中九成、逾一萬件收藏品捐晒畀香港大學圖書館特藏部，為遺物提供一個好嘅「歸宿」，大家亦可對華叔一生嘅思想同生活有更深入了解。不過，有部分私人書信遺物涉及私隱，相信要多年後至能解封。
「司徒華書房」尋日舉行移交儀式，港大校長徐立之、華叔胞妹司徒嬋、司徒娟、胞弟司徒強等一家都有出席。姪仔司徒元大爆唔少華叔鮮為人知嘅一面，好似華叔細個唔鍾意睇兒童讀物，反而做咗《兒童報》總編輯後，為增加創作靈感至開始睇。藏品唔少得華叔最愛嘅杜甫同魯迅詩集，仲不乏外國文學作品。
值得一提係華叔少年時珍貴嘅相片、畫作同文章，其中一幅華叔喺紅磡街坊公立學校做首任教職員嘅合照，同場仲有佢嘅紅顏知己黃少容。
徐立之（右起）、司徒強同港大圖書館館長蘇德毅一齊出席移交典禮。
司徒華（後排左三）首任教職員嘅合照，同場仲有佢嘅紅顏知己黃少容（中排右一）。