政壇：何兆煒復出搵真銀

好多人都話「跌低咗唔緊要，最緊要企得番起身」，而呢句說話用喺醫管局前行政總裁何兆煒身上就最適合，佢老兄○五年因沙士爭議下台後，唔夠半年去咗東華三院做總監，○九年幫城大搞獸醫學院，雖然到依家仲未搞掂，但又被人挖角撬走，今年二月正式去聖保祿醫院做院長，復出搵真銀。據醫學界人士畀料，一個私家醫院院長人工，最少都二十萬一個月，即係二百幾萬年薪，睇嚟何兆煒今勻過檔，夠過一個肥年有凸。

公院薪酬待遇差，令唔少大國手都心淡，轉戰私人市場搵真銀，何兆煒就係最佳人辦。佢尋日大方承認，自己二月就會過檔聖保祿醫院做一哥，但被問到點解唔返去公家醫院做，佢就笑笑口話覺得發展私家醫院係大趨勢，想試吓新嘢先過去，至於係咪高薪挖角，佢就即刻封晒口。但有知情人士話請得佢出山，人工唔會低得去邊。

耍手擰頭拒夫妻檔

佢又話依家喺中大教緊書，做院長之後如果有時間，都會繼續執教鞭，而城大搞獸醫學院一事，亦會繼續進行。佢自爆今次過檔，人情味好緊要，因為聖保祿有一大堆醫生都係同年一齊讀醫嘅同學仔，依家見番佢哋，感覺親切啲，合作都好啲。

醫學界都好想八卦佢會唔會撬埋老婆、仁安醫院婦產科專科名醫董曉方過去搞「夫妻檔」，但佢即刻耍手擰頭。而依家每間私家醫院都有特定服務方向，有醫院專做整容，有醫院就做生仔最叻，咁究竟佢會帶領聖保祿走乜嘢方向呢？佢話自己未做過私家醫院，所以上任後，都係學嘢為先，現時都未諗到大方向係點。