門常開招惡菌 跛腳鴨危危乎

咪話唔信邪，港府時運不濟，頭頭碰着黑，五勞七傷唔在講，連添馬艦政府總部都被退伍軍人症攻陷，淪為惡菌溫床，搞到人心惶惶，睇怕夕陽政府都好難有運行咯！

政府總部變惡菌總部，繼教育局局長孫明揚辦公室同特首辦後，再有五名局長嘅辦公室私人洗手間驗出退伍軍人症桿菌，加上同樣發現中招嘅食堂廚房同咖啡室，惡菌可以話無處不在，都咪話唔得人驚。

「門常開」作為港府總壇、特區心臟，開張四個幾月啫，居然真係門禁大開，被奪命惡菌長驅直入，如入無人之境，講都冇人信。堪輿師傅指點迷津，話「門常開」設計犯下風水禁忌，信不信由你。計太一叮話齋，新政府總部表面金碧輝煌，實際上由興建至落成事故不斷，甩漏不絕，正式係金玉其外、敗絮其中，惡菌孳生，何足為奇？

開講有話，一正壓千邪，可惜港府小人當道，正氣不彰，邪氣病氣自然積聚孳生，遺禍作惡o架啦，叮！

嗱嗱嗱，高官為政無道，不得民心，太一叮唔係冤枉佢哋o架。港大最新民調顯示，煲呔曾民望跌至「肥佬」嘅四十九分，反對佢出任特首嘅比率更加創出七成一嘅新高添。民調如鏡，煲呔曾成過街老鼠，能唔能夠捱埋餘下半年任期，恐怕都成問題。

禮賓府主人民望低殘，港府亦唔好得幾多。民調顯示，四成七受訪者不滿政府表現，尤其對改善民生同促進民主，不滿率分別有五成八同五成。睇嚟民意對煲呔曾政府嘅不滿情緒，孳生速度仲快過退伍軍人症桿菌。

即係咁，民調顯示煲呔曾政府民望跌跌不休，一啲都唔出奇。大家有眼睇，夕陽政府上上下下「退伍官人症」發作，人人翹埋雙手等收工，施政得過且過，卸得就卸，將一堆堆爛攤子留晒畀下屆政府，咁嘅高官，咁嘅政府，點會得人支持吖？

所以話，香港回歸十五年，管治亂象叢生，社會亂七八糟，港府就係禍源病灶。八年「建華之亂」固然唔使多講，煲呔曾繼任後不但冇做好自己份工，反而倒行逆施，變本加厲，成為港府病灶中最壞最惡嘅大毒菌。

嗱，老董就腳痛落台啫，話唔定煲呔曾政府提早集體「退伍」，咁就該煨咯，叮！