政壇：賢慧社邀千童遊海洋公園
香港青年聯會一班俊男美女日前齊集中環蘭桂坊送舊迎新，專程由加拿大返港過節嘅青聯賢慧社前主席彭芷君（Gigi）同做心胸肺外科專家嘅老公辛光耀拍拖到場，大家好久不見，莫不熱情擁抱，場面溫馨。賢慧社主席羅詠詩（Anthea）、副主席林玉茵、常董蔡敏思、秘書長費詠詩等靚女都現身同樂。
席間大家都少不了講吓團體活動，賢慧社嚟緊嘅重頭戲係舉辦「青聯賢慧愛家日」活動，預計喺四月中旬，將帶過千名來自低收入家庭及少數族裔嘅小朋友，免費暢遊海洋公園一日。Anthea話，呢個活動已舉辦咗兩年，今年幾忙都會再去，佢哋正努力籌款希望有更多小朋友受惠。
「青聯賢慧愛家日」活動，將會帶低收入家庭嘅小朋友暢遊海洋公園。
賢慧社靚女齊歡聚。前排左起：林玉茵、羅詠詩、彭芷君及老公辛光耀。後排左起：譚綺華、張詩培、林海容、費詠詩及蔡敏思。