政壇：葉劉囡囡憂惡菌奪母命

添馬艦新政府總部同新立法會大樓都驗出有退伍軍人症嘅惡菌，搞到喺上址返工嘅人個個自危，堂堂一地行政、立法機關搞到成為惡菌溫床，香港今次真係醜死都有份。不過，經常要返新立法會大樓開會嘅新民黨主席葉劉淑儀就唔係好擔心，反而囡囡葉榮欣Cynthia驚青啲，葉太話，個女擔心一旦媽咪唔好彩染病，甚至出現最惡劣嘅情況，已得一個家長嘅佢會變成孤兒喎，真係大吉利是！

葉太雖然講得輕鬆，但都做好個人衞生措施，隨身帶備酒精消毒液，每次洗手都會用，唔擔心經由新大樓嘅食水喉感染細菌，佢反而埋怨新大樓嘅廁所水系統好有問題，成日未解決完就會自動沖水，有時仲會沖幾次，嘥水兼嚇親人。佢估計今次惡菌風波都係因為趕工同搬得太急出事，好似以前新機場大混亂咁，總之講到尾又係煲呔曾唔啱啦！

呢輪假期多多，葉太早前都同Cynthia去咗澳門度假，佢哋品嘗美酒、美食之餘，母女兩個人都趁機聚天倫，感情更加好。