政壇：黃靜文慶幸無私人廁所
新政府總部被退伍軍人症惡菌攻陷，有低級公務員大嘆返工好似冒住生命危險咁，不過，一眾高級官員就要死撐，尋日多個局長辦公室嘅私人廁所都驗出有菌之後，我哋問到政制及內地事務局副局長黃靜文驚唔驚，佢笑笑口淡定話唔驚，不過，原因卻係：「我又無私人洗手間！」
黃副局長嘅言論真係得人驚，到底佢係撐新總部安全，定係唔忿局長有私人洗手間呢？佢嘅上司聽到呢句話，應該自我反省點解要用私人洗手間，定係應該訓斥呢個下屬太風涼呢？睇怕聽到呢個回應最心噏嘅，應該係教育局局長孫明揚，因為佢係用私人洗手間用出禍嘅第一隻小白鼠囉。