政壇：工專聯三黨分工搞年宵
立法會幾個建制團體走埋成立工商專業聯盟（工專聯）後，至今都好似冇乜實質成果，最為人熟悉反而係破鏡重圓、齊齊加入聯盟嘅自由黨同經濟動力，過去佢哋屢次傳出口和心不和，但據聞工專聯最近終於齊心一意做番件實事，就係分工合作搞好維園年宵攤檔，據講自由黨同經濟動力負責撲水，專業會議就提供人力支援。
工專聯喺年宵擺檔期間會否一心一意冇爭拗，仍有待觀察，事關工專聯嘅團隊精神尚未展現，例如去年底區議會選舉未有派人打正旗號參選，今年九月立法會選舉亦係同一命運，即自由黨、經濟動力同專業會議會繼續各自參選，以免突然變陣影響選情喎。