政壇：黃春平唔解謎落荒逃

新一屆區議會履新後，尋日多區相關開會選舉正、副主席，被揭發做過中聯辦高層、做咗觀塘秀茂坪北區議員嘅黃春平尋日都有現身，外界對佢疑問多多，尤其係唔少人疑慮係咪中央叫佢參選以滲入香港政壇？原本佢話會後交代疑團，但最後就搞到要由逃生門落荒而逃，好似身有屎咁。

黃春平尋日抵達觀塘區議會後，即被記者重重包圍，佢話自己唔係共產黨員，循合法途徑、經入境處來香港，參選區議會亦係合法嘅。至於佢喺中聯辦工作已係十年前嘅事，佢亦唔知十年前嘅事都要寫出嚟，所以無向街坊隱瞞身份，佢仲話，其實「好多街坊都知」佢喺中聯辦做過喎。

會議之後，佢孭埋背囊準備離開時，有區議會秘書話黃春平稍後會到（車立）口正式回應記者提問，不過，講講吓黃忽轉身衝入一個寫住「如非必要，切勿使用」嘅緊急逃生出口，由三樓一直走到地下，全程淨係講：「我已經答晒」，就連對未來議會工作嘅睇法，都係話：「我已經答晒」，最後跳咗上一架的士落荒而逃。驚到咁，第日點開會同見人呀﹖

正、副主席選舉方面，觀塘區由陳振杉、蘇麗珍冧莊；黃大仙就係李德康、黃錦超；大埔區就係張學明、文春輝；灣仔區係孫啟昌、吳錦津。