政壇：張炳良拜拜行會

現屆政府及曾班子已踏入倒數期，心生離意嘅問責官或建制中人愈嚟愈多，身兼多個重量級公職兼行會成員嘅教院校長張炳良尋日都提早揚聲，透露七月新一屆政府接班後，佢不會再做行政會議成員，張炳良早早表態要飛起行會，據佢嘅解釋係七年之癢，即係佢已經做咗七年喇，應該讓位畀其他人喎！

重提香港核心價值

張炳良早前接受電話訪問，尋日播出嘅內容就透露佢嘅動向，佢話自己已經做咗多年行會「要吸收嘅經驗有喇，要畀（政府）嘅角度有喇」，換言之，佢覺得過去七年積累嘅經驗、向政府提供嘅意見及施政參考亦足夠，所以，係時候退出呢個舞台，換其他人做吓。

佢冇解釋點解咁早揚聲，但就對政局依然熱心，仲提醒啲特首參選人要堅守香港嘅核心所在。佢話，雖然好多人期望新特首會帶領本港經濟發展，但更多人會問嘅係，咁樣會唔會失去香港核心價值，呢啲都係特首要答嘅問題。過去都有唔少學者關注過呢個問題，張炳良一方面宣布唔玩行會，一方面又重提香港嘅核心價值，臨別贈言嘅味道好濃。

研究公共行政嘅張炳良又大談佢對政治嘅興趣，佢自爆年輕時已對政治好有興趣，記得五十年代，自己仲係後生仔時候，為咗了解啱啱成立嘅新中國，就走去左派戲院睇內地電影，每當前領導人毛澤東出鏡時，啲人就會企起身，佢都覺得認真趣怪。睇戲之外，張炳良仲落手落腳搞活動，試過喺學校同啲同學仔一齊搞十．一及雙十活動，結果畀老師鬧佢做乜喺學校講政治喎。