《太陽》贈送現金券 這個新年好快樂

過咗聖誕快樂，當然就係新年快樂啦。今個新年可以點樣快樂呢？嗱，咪話太一叮唔醒你，快啲去買《太陽報》啦，事關讀者將會好Happy！

過去幾個月，《太陽報》回饋讀者，只售四元，全港最抵。雖然由於各項成本不斷上漲，明日起調整售價至五元，但仍然平過其他收費報紙o架。仲有吖，大家唔好以為《太陽報》今次純粹調整售價喎，查實係繼續回饋讀者至真，事關《太陽報》將會由明日起一連七日隨報附送兩元百佳現金券，憑券可到百佳超級市場旗下任何一間分店當現金使用，讀者有優惠，非常之盞鬼！

簡單咁講，你付出五元買《太陽報》，得到嘅除咗係一份包羅萬有、精彩紛呈嘅報紙，仲有兩元百佳現金券，實際只係付三元。喂喂喂，三蚊雞代價就可以同時換取精神食糧以及真正食糧，大家有乜可能唔快樂先！

等太一叮再強調多一次，市面上其他收費報紙賣六元，購買《太陽報》嘅實際開支係三元，足足平咗五十巴仙，簡直係超晒值喇！

大家可能會話，太一叮呀太一叮，唔好咁高調賣花讚花香吖，樹大招風o架。話雖如此，不過太一叮又有另一番見解喎，既然你賣嘅花真係香噴噴，點解唔可以豎起兩隻拇指讚一讚呢？正如衣錦還鄉，冇理由半夜三更行一條冇燈嘅隱蔽隧道啫，吓話？

先睇讀者人數吖，《太陽報》真係抵讚o架。根據國際市場研究公司Oracle Added Value早前調查所得，《太陽報》同《東方日報》讀者人數合共超過五百萬，覆蓋全港七成半人口。《東方日報》連續三十五年高踞全港銷量第一寶座，呢家嘢唔使多講，《太陽報》勁就勁在，除咗強勢穩佔第三大報位置之外，讀者增幅更加驚人，比率係百分之二十六點一。《太陽報》家陣嘅讀者人數超過一百六十三萬，你話呢朵花係咪香噴噴吖？

再講內涵，《太陽報》形象清新，版面簡潔脫俗，報道詳盡扎實，一向深受包括年輕人在內嘅各階層讀者愛戴。你知啦，年輕讀者係消費力強勁嘅一群中堅分子，廣告客戶自然大受裨益。

咁都未算喎，《太陽報》更加係精益求精日新又新，好似Sunlife特刊咁吖，一月份加猛料益讀者。星期日Sunday歎世界增添家庭親子元素，打造周日閒情，具體內容包括特色Playgroup介紹，以及周日Mall帶大家逛商場。星期一Sun Money主要針對年輕人投資之道，介紹年輕才俊、新興行業、國際品牌以及另類投資等等。最新貢獻仲有《Sun微博》，周一至周六，由網民暢所欲言，不吐不快。

講到呢度，大家係咪已經心中有數呢？記住，二○一二年一月一日，即係明日起，《太陽報》一連七日附送百佳現金券，千祈唔好錯過呀！