政壇：賭王捐千萬建設仲愷學院

賭王何鴻燊為善不甘後人，善業遍布大江南北，早前捐出一千萬元人民幣，支持興建仲愷農業工程學院白雲校區。校方投桃報李，除咗搵燊哥擔任學院副董事長，仲將其中一幢校董樓命名為「何鴻燊實驗大樓」。該學院落成暨校董樓揭牌儀式前日舉行，四太梁安琪代表燊哥出席。

身兼校董嘅澳博行政總裁蘇樹輝，前日亦陪伴四太出席儀式，兩人齊為大樓內嘅何鴻燊博士銅像揭幕，見證歷史性時刻。銅像造型栩栩如生，相信燊哥睇見實好開心。查實燊哥早喺○八年已捐出八百萬元人民幣支持該校建設，前日再加碼捐多二百萬元人民幣，佢認為掌握學問唔單止終生受用，仲惠澤社群。

金利來太子爺曾智明、「牛仔褲大王」楊釗弟弟楊勳都有出席儀式，原來智明爸爸曾憲梓同楊勳都係善長，有份出錢出力支持該校建成，故校方興建幾幢校董樓，除有以何鴻燊命名外，仲有「曾憲梓樓」同「楊釗楊勳樓」。