政壇：發叔撐女婿爭離島區會主席

新一屆區議會明日履新，各區區議會正、副主席職位亦即將選出，一直由鄉事派獨領風騷嘅離島區議會近期傳出內訌消息，據講主席競逐熱門人選有兩個，一個係接替林偉強做咗主席嘅南丫南鄉事委員會主席周玉堂，另一個係「新界王」劉皇發嘅女婿余漢坤，呢次選舉嘅焦點之一係發叔會唔會喺幕後遙控、硬撐女婿。

委任制名單日前出爐，各方都認為新一屆區議會主席由周玉堂冧莊之際，卻有風聲話獲續委任為離島區議員嘅余漢坤四出放風要選主席。

消息人士話，離島一眾鄉委會主席對此大感不滿，除咗因為離島區議會主席應該由離島鄉紳做外，佢哋亦對離島喺今次特首選委會選舉鄉議局界別中得番兩席頗為憤怒，因為原本協調係三席，懷疑鄉議局有勢力人士出手所致，搞到八個離島鄉委會主席早前聯署去信鄉議局，仲話要杯葛鄉議局一月搞嘅新春酒會添。

一波未平，發叔女婿又想選主席，到最後，發叔嘅態度又係關鍵。我哋尋日試過搵余漢坤，可惜電話打極唔通，留言都冇人覆。鄉事勢力爆出局與地方嘅紛爭，二○一二年真係好戲連場！