政壇：煲呔曾無恥自吹

二○一一年最後一日來臨，任期得番半年嘅煲呔曾都進入最後抽水期，尋日有電子傳媒播出佢嘅訪問，一向面皮夠厚嘅煲呔曾再次發揮大言不慚風格，講經濟大環境、新舊政府交接都不忘為自己面上貼金，一陣話自己「親身落場」應對惡劣嘅金融衝擊，一陣又話當年老董因病離任，自己上任時「可以話冇交接」，一味自吹自擂充大頭鬼，其實，佢有冇諗過如果當年有交接，仲輪唔輪到佢執死雞呢？

缺席晚宴步孫公後塵？

牙擦完冇耐，煲呔曾尋晚突然兼離奇缺席童軍一百周年晚宴，由於添馬艦新政府總部發現退伍軍人症惡菌，官員人人自危，煲呔曾會唔會變咗第二個孫公呢？我哋尋日問過特首辦煲呔曾突然缺席嘅原由，發言人僅稱煲呔曾有啲事，由其他官員代為出席，至於問到係咪病咗，發言人就冇任何補充。呢啲算唔算應該揚嘅唔揚呢？

講番煲呔曾接受電台嘅訪問，佢喺訪問中話，明年同下屆政府嘅交接安排係新嘗試，希望唔會影響到社會同民生，仲揚言希望成為一個典範，事關佢○五年上任時，同前朝政府可以話係冇交接嘅。佢咁講，無非想話畀人聽佢幾叻，喺冇交接、擒擒青接手嘅情況下，都冇任何問題，完全當呢幾年嘅香港亂事冇到。

只不過，煲呔曾呢番說話都可算搬石頭砸自己腳，試問如果當年嘅政治局勢容許慢慢交接，煲呔曾有冇冷手執個熱煎堆嘅機會呢？係人都知，中央當時根本冇諗過畀煲呔曾做呢份工，只不過老董腳痛提早下台，煲呔曾先至執死雞啫，依家講風涼話真係唔怕人恥笑。

愈講愈興奮下，佢又叫大家居安思危，然後入正題吹噓自己做主要官員期間經歷過一、兩次金融風暴，算係「親身見到、親身落場 」喎，死都攬住當年入市打大鱷嘅功勞唔放。佢既然數白欖，點解又唔講吓任內貧富懸殊日益嚴重？以及冇屋住、生活水平倒退嘅人愈嚟愈多呢﹖跟住佢仲話，香港政治環境要求愈嚟愈高，喺政治鬥爭更加明顯之下，「冇辦法唔學識好多樣嘢」。可惜佢學嚟學去都學唔精，變成九流政治家。