熱帶語林：打野戰 為勢所逼

好聽一點是野鴛鴦，難聽一點是狗男女。一男一女大剌剌於公園埋身肉搏，男的長褲脫下，女的擘腿迎賓，上下晃動搖曳生姿，給好事之徒全程直擊拍下短片網上瘋傳。由於此事發生於聖誕翌日Boxing Day，網民名之曰「香港真人扑性DAY」。

大庭廣眾何以猖狂若斯？慾火焚身何不闢室尋歡？為了解開這一個野戰部隊打真軍的選址謎團，本欄特派記者明查暗訪，得出以下各界意見──

公屋居民：「噯，有乜咁出奇啫，你畀着我都會選擇打野戰啦。我哋公屋單位豆腐膶咁細，一家七口擠迫戶，何來多餘空間去做愛做嘅事呀？與其畀爸爸媽媽哥哥妹妹圍觀，我寧願畀三唔識七嘅陌生人圍觀咯！」

劏房居民：「如果真係十萬火急，我都寧願打野戰o架。喂，你知唔知劏房係現代版『七十二家房客』？你試下帶個朋友仔上嚟曳曳吖，左鄰右里一係投訴你太嘈，一係就同你打拍子伴奏，再唔係就笑到你臉黃，梗係去地方寬敞嘅公園穩陣啦。再講吖，住得劏房呢種港式貧民窟當然係窮光蛋，一定冇錢另外租房。」

籠屋居民：「你都傻嘅，唔去公園去邊呀？我哋籠屋地方淺窄，轉個身都有困難，而且建造材料危危乎，一個唔覺意動作劇烈得滯，冧都有之呀！」

V煞示威者：「反對官商勾結！打倒地產霸權！還我廉價爆房權！家陣租金實在太貴嘞，莫講酒店旅館吖，連時鐘酒店都貴得驚人，何來閒錢闢室尋歡呀！」

綜合上述意見反映，本欄得出一個結論，打野戰純屬為勢所逼，此乃香港居住環境衍生出來的窮風流，圍觀者切莫少見多怪。野鴛鴦也好，狗男女也罷，選擇公園進行周公之禮，必有其不足為外人道的難言之隱。