陰陽怪氣認第一 《明報》鬼祟玩把戲

魯迅講過，「中國歷代的宦官，那冷酷險狠，都超出常人許多倍。」宦官者，太監也，又叫公公、閹人，由於佢哋生理唔正常，導致心理亦唔正常，所以冷酷險狠自然唔係普通人咁品喇。大家咪以為太監已成為歷史，其實今時今日仲有呢種人o架，呢，自認「公信第一」嘅《明報》一向鬼鬼祟祟，陰陰濕濕，咪似足太監囉。

話說有位十八歲青年涉嫌喺網上訛稱出售海洋公園門票騙財，被控串謀詐騙罪。呢單本來係好普通嘅刑事詐騙案，點知陰陽怪氣嘅《明報》竟然乘機大做文章，指被告八個月大時因為肝臟衰竭，急需肝臟移植，後獲東方日報慈善基金籌得過百萬元，資助佢去澳洲做手術執番條命，被告後來因為貪念而誤入歧途云云。

叮！咁嘅所謂報道含沙射影，單單打打，一睇就知別有用心喇。冇錯，東方日報慈善基金以濟困扶危為己任，替有需要嘅市民排憂解難，歷來助人無數，當年資助呢位幼兒換肝，完全出於善心，咁又有乜嘢問題呢？唔通做善事都唔啱？受助人當時只有八個月大，同佢十幾年後犯案大纜都扯唔埋，《明報》穿鑿附會，故意將兩件事拉埋一齊講，究竟有何居心？

係人都知，太監最大特點係心理變態，《明報》成日自吹「公信第一」，自得其樂，自我滿足，根本就係典型嘅太監心態。可惜，太監就係太監，點吹都冇用，《明報》烏龍百出，笑料多多，幾乎每日都要「更正與澄清」一番，公信早就破晒產喇，仲吹乜鬼！

最經典就係當年北京奧運閉幕禮上，英國球星碧咸明明喺雙層巴士上一腳踢走個波，但《明報》嘅「即時新聞網」居然話佢由巴士跳落嚟，一邊踢波一邊衝向人群喎。你話喇，連舉世矚目嘅新聞都可以添油加醋亂咁作，咁嘅報紙仲好意思講「公信力」，係咪笑死人吖？

仲有吖，前排汕尾烏坎村民眾維權事件搞到沸沸揚揚，演變成一場「新農民運動」，備受國際關注，廣東當局後知後覺，處理事件進退失據，受到千夫所指。但《明報》居然罔顧事實，為內地高官評功擺好，擦鞋擦到出晒面。攀附權貴，阿諛奉承，呢啲咪就係十足十嘅太監所為囉。

講番今次呢單嘢，《明報》陰陽怪氣，撩是鬥非，想抹黑東方，但又唔敢光明正大，只能鬼鬼祟祟，搞小動作放暗箭，簡直連太監都不如。正所謂，「螞蟻緣槐誇大國，蚍蜉撼樹談何易」，邊個見過小小昆蟲可以撼低大樹o架？《明報》不自量力，自暴其醜，收檔罷喇，叮！