政壇：搞搞政：影證件相 陳啟宗豪花三金牛
尋日睇過特首選委會候選人申報嘅選舉開支，好多都申報咗「曬相錢」，但呢張並唔係宣傳海報嘅相，而係提名表格嘅證件相。
咁究竟影一打證件相要幾多錢呢？地產及建造界選委何超鳳就用咗二十二個半，漁農界自動當選嘅陳振中只係用咗五蚊。有啲可能用番舊相，所以冇申報。不過地產及建造界選委、恒隆地產主席陳啟宗影三張證件相就足足用咗三百九十七個半！
原來陳啟宗特登喺十一月花咗千九蚊，預約咗攝影師兩小時，又用咗千二蚊整咗三個背景，連埋沖曬費，影兩打證件相一共用咗三千幾蚊。影證件相都咁大陣仗，但佢又勝在夠均真，只係申報咗三張證件相嗰三百幾蚊。同樣咁均真嘅仲有恒生銀行女大班梁高美懿，佢嘅開支達九千三百幾蚊，其中有七千幾蚊，係恒生員工提供嘅服務。
