政壇：李天穎夫婦互相遷就
挽救咗唔少生命嘅服務機構「生命熱線」尋日舉行發布會，請來名導演高志森同有「冷面笑匠」之稱嘅Michael許冠文聯手合作，喺明年二月十號開演一場名為《男女戰爭》嘅個人棟篤笑，為機構籌款。
生命熱線主席兼棟篤笑名譽贊助人郭炳湘太太李天穎，一見到Michael就好興奮咁同佢握手合照，原來佢係Michael嘅忠實粉絲。佢話好欣賞對方幽默搞笑嘅才華，雖然自己好少睇港產片，但唔會錯過Michael嘅經典笑劇。《男女戰爭》係講兩性相處之道，郭太話夫婦之間最緊要互相遷就，如果嗌起交上嚟，咪隔一晚攤凍先再傾囉，但邊個氹番邊個先，就要睇邊個唔啱在先喇。
郭李天穎（中）請嚟許冠文（右二）同高志森（右）合作搞棟篤笑籌款。