政壇：公民力量唔幫建仔抬轎

沙田地區政團公民力量同建仔一直都係好拍檔，而建仔副主席劉江華亦係公記創辦人之一，但事情可能有變。公民力量孖埋鄉事派打算另起爐灶，進軍明年嘅立法會選舉。

消息人士透露，事情有咁嘅發展，係有人使橫手，推倒原本可獲委任做區議員嘅現屆沙田區議會主席、公民力量韋國洪，矛頭直指現屆副主席、建仔嘅彭長緯。

唔好唔記得，韋國洪除咗係公記靈魂人物外，另一身份係新界鄉議局執委；據講，自從韋國洪委任甩轆後，有鄉議局領導人建議佢拉隊選立法會，有原居民加埋公記支持，喺出年立法會新界東選區隨時贏得一席都唔出奇。我哋搵過韋國洪本人，佢對傳聞不置可否，但承認「極度積極考慮」喺新界東出選立法會。

至於被指打小報告嘅彭長緯就否認其事，話自己絕無意思做主席，更無能力左右民政事務總署嘅決定。佢亦話唔知點解有呢啲消息傳出，沙田區內一直都好和諧咁話。