養老莫齋噏 吹水要抹嘴

噢噢喔！普天同慶嘅節日又到，聖誕老人又出動啦！今年香港好特別，一早就有人通街派大禮，不過唔係派糖畀小朋友，而係派期票畀公公婆婆。

特首選戰不斷升溫，各參選人近排不約而同就安老問題頻頻吹水，誇誇其談，甚至大開期票。有人建議增加基層長者生果金，有人就話解決安老問題唔可以淨係靠提高生果金，要「通盤考慮」，有人甚至提議「養老三級制」等等，總之講到天花亂墜，幾乎連天上嘅星星都應承摘落嚟咁滯。

嗱，嘢可以亂食，期票唔可以亂開o架。選舉承諾最緊要兌現，吹到天花亂墜都冇用，如果為咗博掌聲呃選票，下巴輕輕乜都話得，當選之後又唔認數，咁咪即係欺騙市民！

呢，煲呔曾當年建議對生果金引入審查機制，敬老變虐老，搞到人人喊打。面對全城震怒，佢扮晒魚蝦蟹，話「我自己亦係老人家」，唔會唔知長者嘅感受，仲承諾盡力保護長者權益添，但結果完全唔係嗰回事。

煲呔曾講一套做一套，設立全民退休保障制度、增加醫療及康復配套服務呢啲長遠政策拖得就拖。所謂照顧長者措施，只係零零碎碎，小恩小惠，對解決安老呢個老大難問題，根本無補於事。

講開又講，本港人口日益老化，但安老服務數十年如一日，就算有，都係聊勝於無，杯水車薪嗰隻，搞到唔少人臨老唔過得世，要靠執紙皮維生。仲有吖，安老院舍宿位長期供不應求，每年數以千計長者喺輪候期間離世；回鄉養老長者喺內地領取高齡津貼嘅「廣東計劃」，仲要拖到後年至實施；即使老人家離世，亦因骨灰龕嚴重短缺難以安息。

叮！老無所養，貧無所靠，病無所依，死無所歸，呢啲就係港府安老政策嘅「政績」嘞。香港自認國際都會，但老人家連最起碼嘅退休保障都冇，安老服務水平莫講同歐美先進國家比，甚至連隔鄰嘅澳門都不如。

澳門政府年年還富於民，除咗人人有錢派，敬老金更係年年增加。相比之下，港府坐擁金山銀山，對長者卻一毛不拔，簡直豈有此理。咪話太一叮唔提醒，刻薄老人家唔會有好下場，如果下屆特首好似煲呔曾咁忤逆，好快玩完嘅咋，叮！