CULTURE嗡：Hand-made禮物抗濫消費

這次我們找來80後的Shelley，分享hand-made送禮文化。

又到聖誕節，今年你收到幾多張聖誕卡、幾多份聖誕禮物呢？愈來愈多80後喜愛hand-made禮品，親手製作賀卡、小禮物，將送禮的真正意義—心意和祝福，帶給摯愛親友。浸會大學社會工作系教授趙維生認為，這反映在物質主義社會下，年輕人不願意被消費文化操控，反以創意和心思，拉近人與人之間關係。

Shelley：80後，現從事文職工作；五年前開始hand-made禮品，送贈親友。

趙：浸會大學社會工作系教授趙維生

Shelley：

我整嘅第一件hand-made禮物，係母親節卡。童年時，因為無錢買禮物送畀人，惟有親手做hand-made賀卡，夠經濟又獨特。之後人大咗，就發覺喺呢個物質主義社會，大家都講速食，講效益，送禮變成形式。讀大學一年級嘅時候，我就開始hand-made賀卡送畀朋友，希望佢哋感受到背後心意，呢樣嘢用幾多錢都買唔到。

趙：

年輕人嘅hand-made文化，係一種抗逆消費主義嘅表現。資本主義社會強調消費文化，將人與人之間嘅關懷、情感淡化，淪為商品。80後親手製作禮物，反映佢哋唔願意被消費文化操控，希望創作個人風格嘅獨特禮品。

Shelley：

因為hand-made，所以每張卡都唔同，呢樣就係hand-made最珍貴地方。我會按每位朋友性格、興趣及喜好，為佢哋度身訂造每一張卡。例如有朋友喺冬天出世，我會設計一隻帶住頸巾嘅兔仔，條頸巾係自己織嘅。另外，我好享受製作過程，見到製成品一刻，真係好有滿足感。

趙：

年輕人創意強，希望創作一些獨一無二嘅禮品。依家我哋去商場shopping，好似有好多嘢可以買，但絕大部分消費品已經被標準化，你買到嘅嘢，人哋都買到。而每件hand-made禮品都係人手製作，有獨特風格。

Shelley：

除咗卡外，我仲會做小手工送畀朋友，例如八達通套、化妝袋、書套等。喺聖誕節，我會為朋友設計獨一無二嘅聖誕卡，例如寄咗畀一班留學時認識嘅日本朋友，即使大家身處不同地方，亦可以透過hand-made禮品，感受普天同慶嘅節日氣氛。

趙：

近年，節日成為商人賺錢嘅時機，失去節日本身意義。以聖誕節為例，商場售賣好多聖誕禮品包，務求令顧客為消費而消費，淡化人與人之間感情。因此，年輕人以hand-made送禮，能提醒大眾反思送禮物嘅真正意義，亦有助拉近人與人之間關係。