政壇：少年樓神低撈力寶中心
樓市遇冷風，置業決定風險唔少，廖創興家族後人廖偉麟（Jeffrey）精於投資商廈，堪稱「少年樓神」，月前就趁淡市斥資逾三千九百萬元，購入金鐘力寶中心一個二千多呎單位。Jeffrey係樓市大好友，佢話如果樓價再下調，更係趁低吸納嘅良機。
Jeffrey過去幾個月以出貨為主，十二月初沽出力寶中心二座十二樓半層樓面，面積約六千八百多呎，持貨僅一年多，聽聞獲利已達二千五百多萬元，認真和味。佢趁高出貨之餘，十一月尾又喺力寶中心買海景商業單位，對後市一啲都唔驚，仲嗌大家唔使恐慌添。
廖偉麟預測明年樓市下半年會反彈，正等待良機掃筍盤。
