政壇：議員願望：換個好政府

聖誕鐘聲響起時，新嘅一年亦好快到，尋日多個立法會議員講起聖誕願望，唔少人都話希望煲呔曾嘅夕陽政府速速換屆，香港快啲有一個有能力、聽民意、幫到市民嘅新特首上場，解決香港房屋、青年就業同長者安老等急切問題。

新民黨主席葉劉淑儀話，出年最緊要係香港有個好嘅特首，為啲年輕人帶嚟機會。公民黨陳淑莊（Tanya）嘅願望就係要「向錢看」，話最緊要係多啲人捐錢落個公文袋，等下年立法會選舉都可以多啲資源，認真實際。

不過，工聯會王國興對夕陽政府似乎仲未死心，仲列咗張願望清單，又話要傷殘人士搭車有優惠，又話要將勞工假期同公眾假期統一，仲話要中電減電費添。夕陽政府叫中電加少啲電費都難，佢個願望睇怕都好難成真。白鴿黨李永達（高達）就希望該黨主席何俊仁贏到泛民特首初選，相信高達可以願望達成嘅機會，畀Tanya高好多。