政壇：五議員約旦河朝聖淨心
聖誕節富宗教色彩，立法會五議員包括白鴿黨黃成智、民建聯李慧琼（Starry）、專業會議梁美芬（鼠王芬）、同埋「五散人」嘅會計界陳茂波（Paul)與資訊科技界譚偉豪（IT豪)，上周五一齊去咗以色列旅行，赴「神聖之河」約旦河朝聖。
五位政治立場大異、理應大纜都扯唔埋嘅立法會議員，點解會走埋一齊？尤其係喺立法會九龍西直選直接競爭嘅Starry同鼠王芬竟然同行，原因咪係佢哋有一個共通點，就係五位都係虔誠基督徒，以色列嘅約旦河係耶穌受浸之地，係基督教嘅「神聖之河」，每年都有數以十萬計教徒前往朝聖，相信呢個都係五位議員今次嘅必到之處。唔知佢哋洗滌完心靈之後，會唔會放下政治成見、以後鬧少啲交，攜手合作為港人謀福利呢？
五位基督徒議員（左起）黃成智、梁美芬、李慧琼、譚偉豪同陳茂波，結伴去以色列朝聖。