政壇：李春姬泣報唐唐參選

平安夜城中滿是歡樂氣氛，特首參選人唐英年卻唔係好平安，事關佢又成為惡搞對象，有網民將北韓領袖金正日逝世嘅新聞報道，改頭換面變成有關唐英年造勢大會嘅報道，內容雖然爆笑，但仍然畀人大吉利是嘅感覺。

唐英年本月十九日大搞造勢大會，撞正北韓公布金正日死訊，當日北韓中央電視台女主播李春姬泣報金正日死訊嘅片段，搶晒唐英年同一眾支持者嘅風頭。有網民就喺呢段經典片配上中文字幕同相片，內容大意係話唐唐宣布參選，李春姬以無比悲痛嘅表情同聲線嚟表達佢嘅絕望，之後仲串爆唐唐嘅競選口號「We are tomorrow」，令大家喪失對明日嘅希望，「完全係垃圾」，並形容唐唐係「真正死蠢」。

呢段惡搞片名為「北韓就唐英年造勢大片發表沉重聲明」，放上網幾日，點擊率已超過四千。網民惡搞不時都有，唐唐已多次成為惡搞對象，不過講到以外國國家領袖死訊嚟惡搞，就好似有點兒那個囉。講到尾，咁樣只係反映部分市民有幾唔鍾意唐唐。