政壇：搞搞政：根哥扮二撇雞Look聖誕老人

聖誕節到處可見聖誕老人，有啲聖誕老人嘅扮相好掂，日前我哋收到漁農界嘅民建聯立會議員黃容根發出嘅電子聖誕卡，卡中佢搖身一變為聖誕老人，向政圈友好送上聖誕祝福，不過，根哥嘅聖誕老人扮相距離專業水準就太遠。

根哥張聖誕卡設計平實，寫咗句「祝各位聖誕快樂、新年進步」，根哥亦用更換頭像嘅方式扮聖誕老人，落咗唔少心思。不過佢嘅聖誕老人扮相就真係……呵、呵、呵啦。係人都知，慈祥嘅聖誕老人留有鬍鬚，而且係一把大白鬚，根哥卻話之你，唇上一撇黑鬚就照扮可也。咁都未止，聖誕老人哈哈笑嘅嘛，根哥卻好似被人唧吓先笑咁。

講完根哥，近期因加電費問題而畀議員鬧爆嘅環境局局長邱騰華，都被關注公帑運用團體「107動力」惡搞咗個聖誕老人，邱騰華嘅扮相一樣離晒譜，仲諷刺佢推行嘅膠袋稅、停車熄匙、電器稅同加電費，統統都係環保騷！