政壇：經濟動力現形 撐中電假讓步

中電早前宣布加電費百分之九點二引起全城怒火，其後佢哋微調減幅為百分之七點四後，但立法會大多數政黨仍質疑中電係「假讓步」，由自由黨分裂出嚟嘅經濟動力同兩大商會卻急急表示讚賞，一於對中電「小罵大幫忙」，助中電過骨。可惜，立法會前日開會繼續鬧，環境局局長邱騰華都喺立會暗示唔收貨，搞到中電都放風加幅可能會再有下調空間，如果中電再跪低，經濟動力嘅林健鋒同中電盟友要如何自處呢？

經濟動力喺中電「假讓步」後就搶先出稿歡迎中電調低加幅，由批評中電加費到迅即收貨，變臉同反應都一流。香港總商會同香港工業總會亦喺中電微調減幅後發稿大讚，立場同之前聯同另外兩大商會罕有聯手向中電施壓嘅態度完全唔同晒。梗係喇，總商會同工總嘅立法會代表正係經濟動力嘅林健鋒同梁君彥，其中總商會前主席更加係中電控股行政總裁包立賢，經濟動力同相關商會人前小鬧，用嘅都係小罵大幫忙嗰招啫。

劉健儀認當年睇漏眼

翻查往績，大家只要睇番○八年一月政府同兩電簽訂新一份利潤管制協議後嘅立法會會議紀錄，就會發現當時仲係自由黨成員嘅經濟動力議員梁君彥，當年亦都係獨撐政府同兩電，強調百分之九點九九嘅准許回報率合理，形容協議達致雙贏，外國電力公司都唔止呢個回報率喇！

至於當年有份保皇嘅自由黨，今次就喺中電加價問題與經濟動力劃清界線。自由黨主席劉健儀承認當年討論管制協議時睇漏眼，話「當時我哋簡單咗，冇諗到出現咁大問題。」又賴當時未有金融海嘯、政府又話合約到期，全港市民到時冇電用好慘喎。不過佢哋總算有撥亂反正補番鑊，要求政府下令電力公司將固定資產淨值同利潤脫鈎。