高官五勞七傷 港府病入膏肓

呢個政府真係愈來愈弊傢伙，尋日嗰個惡疾纏身提早退休，今日呢個急病入廠，諗住搵個夠班嘅頂上，點知搵來搵去都搵唔到人。唉，跛腳鴨仲撐得幾耐，心照啦！

身患腎衰竭嘅教育局局長孫明揚證實感染退伍軍人症，一度要入醫院深切治療部留醫，好彩情況已經穩定。佢最快下月初至返得工，期間局長職位由副局長陳維安署任。

高官唔係鐵人，身體不適在所難免，問題係孫公唔止頭暈身慶咁簡單，佢究竟可唔可撐到出年七月任期屆滿，可能連佢自己都唔知。今年以來，先有商務及經濟發展局前局長劉吳惠蘭要接受結腸腫瘤切除手術，突然宣布辭職；跟手中央政策組首席顧問劉兆佳入院接受「預防性手術」；時任政制及內地事務局局長嘅林瑞麟緊接住入院「通波仔」。港府問責團隊變咗五勞七傷嘅老弱殘兵，真係可憐復可悲。

高官輪流病倒，唔止係官員嘅不幸，更係港府嘅悲哀。正所謂，軍中不可一日無將，港府施政本來已經亂過亂世佳人，如果群龍無首，豈不是更加亂晒大龍？

鐵打嘅衙門流水嘅官，問責官員出缺，本來補上就係啦，弊在煲呔曾團隊民望插水，管治風雨飄搖，賢能之士避之則吉，冇人願意搭呢條沉船。襄王有夢，神女無心，就算當局物色到適當嘅接任人選，往往食檸檬收場，惟有退而求其次，夾硬搵未夠班嘅上位，演一齣蜀中無大將、廖化作先鋒嘅鬧劇。

最典型例子莫過於，劉吳惠蘭因病請辭，本來順理成章應該由副局長蘇錦樑頂上，但蘇錦樑居然署任咗近三個月先至坐正，證明呢個上任以來醜聞不止嘅政治新貴根本未夠班，港府勉強拉牛上樹，唔怪得烏龍百出喇！

呢，今次署任教育局局長嘅陳維安，同樣係醜聞大王，被指身為教育高官唔撐本港學校，將兩個仔送去讀國際學校，畀人鬧爆。仲有吖，佢喺教科書減價一役搞得焦頭爛額，究竟有幾多斤両，一眼睇晒。

當局施政弱雞，官場人才凋零。計太一叮話齋，有病嘅唔止孫明揚，其實成個政府已經病入膏肓，有冇得醫？你話呢！