政壇：阿Ron送旅遊套票益員工
港交所喺上禮拜五舉行員工周年晚會，今年係阿Ron夏佳理最後一次以主席身份出席，唔知佢會唔會再有「驚喜」，令員工有個美好回憶呢？聽聞，阿Ron今年都真係幾大手筆，已經豪送倫敦雙人同新加坡四人旅遊套票，即係包機票同酒店，畀員工抽獎。唔知邊個係幸運兒呢？
港交所每年嘅聯歡會都有特定主題，今年就玩懷舊，主題係「回憶之夜」，仲建議dress code係要着懷舊服裝。講開「回憶之夜」，好自然會令人聯想起阿Ron六年任期就快到，懷念吓佢喺交易所日子嘅一點一滴。不過，有交易所中人話，佢離任仲有四個月，未有咁快搞歡送會，但遲吓就要諗吓有乜新形式喇。
今年係阿Ron最後一次以主席身份出席港交所員工周年晚會。（資料圖片）