政壇：搞搞政：何君堯吟詩日落潤發叔？
年初擊退新界鄉議局主席劉皇發，得到屯門鄉委會主席一職嘅律師會會長Junis何君堯，早排喺選委會選舉鄉議局界別落敗，發叔事後贈興，話佢得票已經好高，極盡挖苦。有鄉議局中人爆料，話Junis早幾日突然傳咗首詩畀班鄉紳，內容似乎係表達對發叔嘅不滿喎！
首詩係咁嘅：「勸君勿傷夕陽斜，正法弘揚鞭先知。寒冬有盡春無盡，溶了雪花見春花。」有鄉紳分析Junis憑詩寄意，將自己比喻為春天同春花，至於發叔就係日落西山嘅斜陽，同埋將融嘅雪花，似乎要宣洩選委落敗嘅不滿。
Junis否認呢個分析，話冬天梗係要加啲詩情畫意，佢只不過詩興大發同大家分享吓啫，仲希望大家諗嘢簡單啲，唔使咁複雜。
（設計圖片及對白）