唔怕冬至食無雞 最怕禽流又肆虐

禽流感出沒注意！又要大開殺戒喇，是日冬至食無雞，劏雞拜神變咗殺雞防疫，真掃興。不過無計啦，雖然話冬至大過年，但人命大過天，都係穩陣啲好。

長沙灣批發市場一隻死雞證實感染H5N1禽流感病毒，當局銷毀場內一萬七千隻活雞，並停止入口內地活雞廿一日。本地雞場禁止出貨，市民冇新鮮雞食。

港人冬至食無雞唔係第一次咯。自從九七年本港發現全球首宗人類感染禽流感病例，呢種病毒一直揮之不去，久唔久就爆發一次，除咗嚴重威脅市民生命，為生活帶來不便，亦造成巨大經濟損失。呢，二○○一年嗰次，當局為防止疫情擴散，殺咗數百萬隻家禽，損失數以億元計。而且每次殺雞劏鴨之後，賠償問題例牌引起爭拗，搞到社會不寧，矛盾加深。如果話港人聞禽流感色變，一啲都唔誇張。

預防勝於治療，對付禽流感最緊要把好關。港府多年來總算學精咗，先後採取多項措施，可惜百密有一疏，今次禽流感崔護重來，證明有關措施仲存在甩漏，唔及時修補後果不堪設想。

係人都知，最有效嘅預防莫過於源頭堵截。今次驗出帶有病毒嘅死雞，居然連來自內地定係本港都冇辦法確認，當局事後至話會考慮為活雞佩戴腳環，以監控來源。

有家禽批發業人士質疑，當局已經實行多項措施，但禽流感病毒一再出現，同長沙灣批發市場經常有烏鴉、白鴿等雀鳥出現有關，希望當局考慮加建防雀網。

食衞局局長周一嶽就話，死雞或者運到批發市場之前已經染病。港大學者袁國勇則估計，今次染病嘅死雞，好大機會喺農場已受感染。照咁講，現行抽檢制度唔完善，隨時可能有漏網之「雞」，當局有必要盡快檢討，將漏網可能性減到最低。

問題好清楚，現有禽流感防疫機制仍有漏洞，借用高官口頭禪係「仲有好大改善空間」。如果一早採取識別措施，口岸監控同本地抽檢亦寧緊勿鬆，今次禽流感恐慌可能唔會出現，就算出現亦未必要一刀切禁賣活雞，更加唔會搞到市民人心惶惶喇！

講開又講，最近本港防疫警報頻響，前幾日元朗同天水圍先後發現感染禽流感嘅雀鳥屍體，證明今次爆發禽流感唔係偶然，當局千祈唔好再吊吊揈吖。

咪話太一叮唔提醒，一場花園街大火令本港跌出全國最安全城市三十強，如果大吉利是禽流感大規模爆發，香港隨時淪為中國最危險城市都似，叮！