政壇：林鄭蝦碌講錯麵粉廠執笠
發展局局長林鄭月娥早前喺大氣電波提及起動九龍東時，話除咗重建發展外，亦要注重保育，仲以九龍麵粉廠為例，話嗰度停產咗，應保育作為區內地標，可惜佢一直聯絡唔到業主。其實間廠開緊工㗎，身處台灣嘅大業主更加一頭霧水，事關完全冇人聯絡過佢。
林鄭尋日講開今年第四季賣地計劃時，突然喺尾段尷尷尬尬主動話要講番九龍麵粉廠疑似「執笠」事件，佢承認當時搞錯咗，澄清九龍麵粉廠未執笠，又話對事件引起廠主同工友不便公開致歉。佢已透過古物諮詢委員會主席陳智思聯絡咗廠主，希望可以安排到廠房參觀，但廠主話呢排好忙，唔得閒招呼佢。搞錯嘢，好打得嘅林鄭都要耍冧啦，但佢勢估唔到想負荊請罪都食閉門羹啫！
設計圖片