政壇：德成局長諷足總多反派？
香港足球代表隊嘅世界排名，最近跌到去歷史低位，去到一百六十八位，立法會金融服務界議員詹培忠好勞氣點解香港足運咁差，尋日喺立法會提咗條質詢。
德成局長解答金勞詹嘅疑難時，話未來三年會預留二千萬畀足總推行改革，而足總嘅會長同會董，都分別加設年期，唔可以無限連任。講講吓，佢仲話現時足總加入好多正派人士，好似前入境事務處處長白韞六等。咁講法，咪即係暗示以前足總董事好多都唔正派？
最慘在場冇人幫足總講好說話，老公係足總主席嘅紡織及製衣界議員梁劉柔芬冇出聲，而體育、演藝、文化及出版界議員霍震霆可能因為屋企爭家產風波而缺席會議。德成局長亂講嘢，都冇人幫佢兜。