政壇：陳振聰陪母做冬食平啲
冬大過年，中國人一家團聚做冬好重要。官司纏身嘅陳振聰前晚就以孝順仔姿態，設宴慶祝媽媽病愈出院兼做冬。身為長子嘅佢親自幫媽媽推輪椅，氹得陳老太笑到四萬咁口。不過佢因為打官司而燒晒啲銀紙，前晚只光顧大眾化嘅酒樓食晚飯，佢話：「今日提早做冬，多謝關心。」
陳老太因為一直患有肝病，喺養和醫院休養近一年，日前終於出院，陳家上下都好開心，前晚齊齊去太古城中心一間酒樓食晚飯慶祝，順便團圓做節，陳振聰三弟振田、四弟振國都有現身。佢哋喺酒樓包咗間獨立廳房，食到十一點至盡興離開，走時陳振聰同媽媽仲邊行邊傾，非常溫馨。
除咗慳住食之外，陳振聰早前話因為打官司使咗佢好多錢，所以住唔起月租五十萬嘅歌賦山道獨立屋，要另覓居所，據聞最近佢一家已經搬咗去南區一個洋房單位。
陳振聰（右）四萬咁口，推住笑得好甜嘅媽媽。（蔡楚華攝）