政壇：張建宗卸膊統計處

煲呔曾班子呢個夕陽政府，雖然只係剩低幾個月任期，但估唔到佢哋一味諗住等夠鐘走人。好似三大熱門勞工議題咁，包括最低工資水平檢討、研究標準工時，仲有公眾假期同法定假期統一，勞工及福利局局長張建宗全部採「拖字訣」。

畀埋方法都唔採納

立法會尋日其中一條質詢，就係有關公眾假期同法定假期嘅爭議，事關前者有十七日，後者得十二日。街工梁耀忠話兩者一日唔睇齊，都會令打工仔之間產生分化，因為一般藍領都係放法定假，但返銀行就可以放公眾假，變相多幾日假。阿忠要求政府盡快就兩種假期合併，並且盡快向全港市民諮詢。

但張建宗話由於局方唔知道幾多人係放緊公眾假、幾多人係放法定假，惟有搵統計處計好數字，先至可以做下一步，仲話最快要到明年至有數據喺手。

聽到咁講，班議員即刻鬧爆佢冇誠意，建仔嘅議員話，其實可以分五年時間將假期統一。連方法都畀埋政府，但張建宗都唔敢採納，只係一味播帶話現階段最重要有數據先。

其實，張建宗大打「數據牌」嚟拖延時間，已經唔係第一次，上次立法會議員問佢幾時先會檢討最低工資水平時，佢都係用呢招打發議員，之後有議員問佢幾時展開標準工時研究工作，佢又係出呢招應對，睇嚟佢根本係想將個波踢畀下屆政府，根本冇諗過要解決問題。