政助浪費公帑 減薪留職搵笨

寶藥黨呃人唔係奇聞，但假如，搵完你老襯後竟然主動摸上門，笑住話假藥的確毫無療效，為表歉意，特准閣下用半價幫襯多一次，你聽完會有乜反應？係咪好想搵掃把狠狠招呼佢哋？

冇錯，情節係就係荒誕咗啲，不過確實真有其事。呢，港府三年前咪引入副局長同政治助理嘅，聲稱可以打通施政經絡，結果貨不對辦，每年白花納稅人幾千萬公帑，港府擺明就係寶藥黨啦。

好嘞，市民發現中咗政治寶藥黨圈套，港府點收科呢？搞笑咯，政制及內地事務局局長譚志源承認，政治助理「角色唔明顯」，不過，唔係建議拆咗呢堆政治僭建物，而係提出下屆大幅減薪。簡單啲講，即係減價促銷，希望保留政助職位，再搵多市民一次笨。

有冇荒謬啲呀，既然都承認職位冇用，承認政助物非所值，點解唔索性取消？曾蔭權政府自己做錯事，點解將蘇州屎留畀下屆政府執手尾？不過咁喎，如果港府真係順從民意，炒晒班政助，唔該大鑼大鼓開記者會公布。你知啦，呢班政助多年來毫無建樹，更加係官場隱形一族，佢哋係咪繼續存在，市民真係唔多感覺到o架。

話時話，政助形同虛設，固然唔應該存在，但刪咗一層政治僭建物，對港府管治一樣於事無補，事關成個問責制根本就係一座大而無當怪獸屋。由司長、局長、副局長到政助，掛名政治問責，其實有責不問。

即係咁，老董時代都試過有高官因為抵受唔住巨大政治壓力而落台，好似前衞生福利局局長楊永強、前財政司司長梁錦松同前保安局局長葉劉淑儀就係例子。煲呔曾政府引入副局政助，話就話擴大問責制，但係慳電膽醜聞等政治風波爆完一單又一單，從未有人需要問責，更遑論有官員下台。問責制同政助一樣，根本就係煲呔曾政府嘅政治擺設。

講起都幾諷刺o架，以前港英政府每個政策局由一個局長帶領，辦事妥妥當當，依家除咗局長，又副局，又政助，施政反而裙拉褲甩。人哋話，三個和尚無水飲，真係有道理o架。環顧夕陽港府，依家有邊個高官唔係抱住做一日和尚敲一日鐘嘅心態返工，日日翹埋雙手等出糧？叮！