政壇： 賭王壓軸賀港大百周年
香港大學尋晚設宴慶祝一百歲生日，逾五千校友、海外校長同城中富豪包括龔仁心夫婦、霍震寰同胡應湘夫婦等都嚟撐場，盛況空前。身為校友嘅賭王何鴻燊都冒寒出席，賭王最叻搞氣氛，直到壓軸切餅儀式一刻先突然出現，引來哄堂掌聲，而賭王見番咁多老友，表現雀躍。
大會仲整咗一條長達二百米嘅「大學道」，擺放多幅昔日大學生活巨型舊照，重溫當年荷花池同陸佑堂等發生嘅舊事。荷花池係著名校友嘅拍拖勝地，「恒生女大班」梁高美懿難忘老公當年經常喺港大校門等佢放學。梁智鴻太太馮令儀難忘那些年冇人追，令爸爸擔心佢太叻嫁唔出喎！
港大校董會主席梁智鴻（前排中）與一眾知名校友齊唱Hall歌，重溫當年情。
何鴻燊精神奕奕到來為母校賀壽，認真畀面。