政壇：教科書招標爛尾 陳維安龜縮快閃

以教育局副局長陳維安為首嘅「學與教資源檢討小組」，負責嘅教科書招標爛尾後，局長孫明揚獨力撐咗成個星期，尋日終於頂唔順，原本應承出席香港大學百周年校慶活動「全球校長峰會」，亦因病缺席，改由陳維安頂上。令「失蹤」咗六日嘅陳維安再現足迹，龜縮咗咁耐，佢究竟諗到啲乜嘢同大家交代？

電子書仲貴 減價無期

三年前，陳維安負責嘅「課本及電子學習資源發展小組」，研究降低教科書書價得個吉，搞到要孫公插手，向書商發最後通牒，話要將教科書招標，並再次交畀陳維安負責領導「學與教資源檢討小組」研究。點知研究又係爛尾，連日嚟畀各界炮轟。孫公日前只好認自己當日講大咗，話想嚇吓書商，反而小組嘅負責人陳維安就連日龜縮，一直未有向公眾交代。

點之尋日佢突然現身港大，原來係頂更。聽孫公新聞秘書講，孫公缺席係因為抱病在身，未能出席，日前已通知港大換人，仲話孫公睇完醫生已經無大礙。

當陳維安等緊拍大合照時，記者主動問佢點解連日唔見人，佢只係笑笑口話搵日坐低先傾，仲急急腳走向人群，迴避記者。記者繼續喺門外守候，望佢致辭完畢後開金口，點知佢竟然喺側門離去，變咗快閃黨。

教科書減價遙遙無期，孫公就翻撻電子書，開放教科書市場，書價有望調低咁話，但詳情未有，一班書商就大唱反調，話電子書仲貴過傳統教科書。唔知嚟緊呢個爛攤子，孫公仲敢唔敢繼續搵副局負責，抑或另搵高手呢？