中電飛擒大咬 政府喪權辱港

「聖誕快樂」係聖誕節嘅例牌燈飾圖案，如果大家嫌行貨，想搞搞新意思，太一叮有個好提議，不如掛「電費快落」吖，夠晒應景，包你紅爆維港兩岸！

冇錯，「電費快落」已經成為香港人嘅聖誕願望。鬼咩，兩電瘋狂加價，飛擒大咬，港府一味出口術，企咗喺度一戙都冇，市民除咗望天打卦，仲可以做乜？咦，咪住先，聖誕老人可能有少少料到喎。喺社會一片抗議聲中，港燈終於順應民意，決定調整累進收費制度，九成住戶嘅實際電費加幅降至不多於百分之四點九七，比原本百分之六點三嘅加幅有所回落，總算低過通脹。

港燈算係回應咗民意，咁中電呢？令人失望咯，話再冇能力推遲加電費喎，企硬元旦起調高電費百分之九點二。大家都知，明年環球經濟陰霾密布，中電飛擒大咬，等於落井下石啫。難怪有人話，唔驚禽流感重臨，最怕「猴擒感」爆發，如果間間公共事業機構都學中電，加價搶錢猴擒成咁，市民就大鑊咯，叮！

話時話，香港市民任人魚肉，財團固然係劊子手，但歸根究柢，令電力公司可以為所欲為化身「電魔」嘅就係港府。嗱，立法會議員就鬧得啱嘞，邊有人好似港府咁戇居o架，同兩電簽訂利潤管制協議，畀藉口人哋年年奉旨加價，任由市民被宰割，簡直就係喪權辱港！

政府跛腳，公權乏力，普羅百姓任人宰割。好似最低工資，結果變咗基層員工嘅最高工資。依家對財團嘅利潤管制又變成利潤保證，咁搞法，基層市民點會生活唔苦？

港府被財團落面，套用曾蔭權嗰句，大家都見怪不怪咯。之但係市民年年替港府受罪，被中電當提款機瘋狂撳錢，咁荒謬嘅事就唔應該繼續落去。

其實，煲呔曾咁有閒情逸致上facebook叫市民反對兩電加價，不如實實在在諗吓點樣補鑊好過啦。計太一叮話齋，中電加價有恃無恐，死結就係香港嘅電力市場被壟斷，獨市生意唔憂做，所以話之你全城聲討，中電睬你都嘥gas，照加價可也。

所以咯喎，煲呔曾如果唔想面懵懵，唔該快快研究開放電力市場，引入競爭。至於中電企硬唔肯調低加幅，戇居政府更加要諗辦法拆掂佢，唔係嘅話，睇怕佢哋今個聖誕都好難快樂咯，叮！