政壇：搞搞政：工黨「摘」社民連玫瑰黨徽

立法會明日就會有新政黨成立，即係我哋同大家講過、由職工盟立法會議員李卓人等創立嘅工黨，將會做工黨紀律委員會主席嘅立法會社福界代表張國柱尋日話，工黨黨徽會用上象徵社會民主主義嘅玫瑰花，唔係嘛？社民連嘅黨徽就係紅色玫瑰哦，雖然工黨嘅玫瑰未必同顏色，但怕唔怕畀人話抄襲概念o架？

阿柱尋日話，佢哋嘅黨徽尚未正式通過，未到最後一刻，都唔敢肯定有冇改變。不過，相信都係會採用綠色加橙色嘅組合，配以玫瑰做圖案，佢仲話，玫瑰代表社會民主主義，已經係世界性o架啦，所以唔怕同社民連撞喎。至於將任工黨副主席嘅何秀蘭亦話，佢哋又唔係用紅玫瑰，唔算同社民連撞喇！

社民連立法會議員梁國雄知道工黨用玫瑰，第一反應係好大方咁笑笑口話無所謂，玫瑰係大家o架嘛，不過講講吓，長毛就寄語工黨「做好自己啲嘢先講」。其實工黨同社民連同樣走基層路線，大家都信奉社會民主主義，兩朵玫瑰都要喺立法會爭艷，話佢哋唔會互相搶客都冇人信喇！