政壇：林煥光會考畀暴動累死
皇仁書院尋日舉行畢業禮，身為舊生嘅平等機會委員會主席林煥光（WK）都有返母校任頒獎嘉賓。講到皇仁歲月，佢透露只係喺皇仁讀咗兩年書，仲話當年會考期間撞正六七暴動，佢喺皇仁考緊英文科時，遇上成班示威者喺學校外叫囂，搞到佢唔可以集中精神考試，最後英文科只係得個D級。
WK話，當時佢去咗好多間港島名校叩門，但間間都唔肯收佢讀中六，好彩最後皇仁有個位剩，令佢有得後補入讀，而且仲讀到理科班添！WK憶述，當年喺皇仁最大嘅得着係遇到兩位好老師，佢哋會帶成班同學去大會堂睇展覽，又教佢哋中國古典詩歌，十足依家嘅通識教育科，但依家因為工作忙已好少同兩位良師聯絡。