年底喜事多，財經界更係嫁娶喜事連連，瑞銀亞洲股票衍生產品銷售部董事總經理于正人，以及法巴上市衍生產品部聯席董事趙海珠啱啱結咗婚，嚟緊又有海通國際證券中國業務部副總裁郭家耀（Matthew）小登科，佢會喺下周一同拍咗六年拖的女朋友結婚。
Matthew嘅未來老婆係佢以前喺敦沛嘅舊同事，下個禮拜，佢哋會喺金鐘港麗擺三十幾圍，到時除咗請晒一班舊同事同其他行家去之外，仲會宴請唔少股評人出席佢嘅婚宴。
搵到人生嘅另一半之後，佢仲計劃婚後盡快「努力造人」，生仔生女都冇所謂喎。
郭家耀（右）同女友婚後積極造人。
