政壇：CY恭賀選委亂點鴛鴦
特首選舉委員會選舉結束，特首參選人紛向一千二百名選委示好，如發出恭賀短訊或電郵，不過，據聞梁振英陣營寄出嘅信件就有瑕疵，事關資訊科技界（IT界）三十名選委嘅恭賀信件有「大兜亂」情況。
早前當選IT界票王嘅莫乃光（Charles）喺社交網站爆料，話特首參選人梁振英（CY）將恭賀IT界選委當選嘅信件全部寄錯晒，佢收咗另一名IT界選委李惠光嘅信件，據佢所知，最少有幾個人都收到唔屬於自己嘅恭賀信。有IT界選委就因老友收到佢封信，自行交換算數。
Charles同我哋講，CY今次出錯真係好論盡，因佢寄錯嘅界別並非漁農界，相反係成日用社交網站嘅IT界，所以好難唔畀人發現，只可奉勸佢下次小心啲。據聞CY嘅競選辦公室發現後即刻補鑊，話一定會再次郵寄恭賀信畀三十名IT界選委。