政壇：多得副手陳維安帶挈孫公病住拆彈

教育局副局長陳維安近排做咗幫倒忙嘅人辦，佢嘅老頂孫明揚飽受腎病之苦，近日卻要頻頻為呢個下屬補鑊。日前我哋先講過，陳維安牽頭嘅分拆教科書一事變成爛攤子，搞到孫公要出嚟死死氣「翻叮」電子教學，話口未完，陳維安上次去立法會財委會申請教資會嘅四百七十多億撥款嘅蘇州屎，又要勞煩孫公出動同立法會議員講數，頻撲之下，據聞孫公已掃除障礙，不過有個撞板下屬，孫公真係有排辛苦囉！

上個星期五嘅立法會財務委員會，討論教育局遞交嘅逾四百七十二億元畀八大院校三年開支嘅申請撥款案，陳維安代表教育局出席，佢早喺教育事務委員會討論嘅時候已埋下炸彈，話大學可能要加學費，當時已有異議，但陳維安有前無後，衝到去財委會，建制派同泛民都唔放過陳維安，一定要當局答應三年唔加大學學費，泛民當時已通晒水叫陳維安休會或者收回文件，陳維安都唔理，結果撥款案過唔到，自己出醜，仲累到八大院校嘅三年撥款冇着落。

大學唔加學費有商量

孫公冇可能睇住教育局嘅艇沉o架，惟有出動執蘇州屎，前排搵啲立法會議員傾，講到明其實政府都應承咗未來一年唔加學費，後兩年就視乎檢討結果而定，依家連檢討都未開始，做得完個檢討都影響唔到後兩年嘅學費啦！簡單啲講，孫公嘅潛台詞之唔係未來三年大學都唔會加學費囉，靈活變通下，議員又落到台，撥款案再上財委會都有揸拿吖嘛。

呢位議員仲話，佢同孫公傾嘅時候，點名鬧過陳維安o架啦，孫公除咗安撫番呢位議員之外，亦表現出一副心照不宣嘅模樣，相信孫公都有「省」過陳維安喇。官場打滾咁多年，孫公都要畀副局長玩殘，除咗勤力啲補鑊，真係唔知可以點囉。