減書價一波三折 電子書九死一生

「一波三折」大家都知點解o架啦，如果撞正仔女問到，又一時諗唔到貼切事例嘅話，太一叮建議大家，不妨搵教育局做教材吖。

點解？呢，教育局咪話逼教科書減價嘅，第一招分拆教材食咗書商大檸檬；第二招威脅統一招標教科書，又怕支出龐大同被批洗腦半途而廢。港府衰完一鑊又一鑊，依家又出第三招，話搞電子教科書喎。

教科書年年起勢加價，家長怨聲載道，遏抑書價係人心所向。奇就奇在，一個人人支持嘅政策，居然都可以搞到一波三折，教育官僚嘅辦事能力有幾高，睇怕都唔使太一叮多講咯！

所謂衰開有條路，分拆教材衰咗，招標教科書唔掂，電子書又點呢？嗱，教育局局長孫明揚吹就吹得好勁嘞，話發展電子課本市場，引入競爭就可以打破書商壟斷局面喎。不過，佢話鋒一轉，留低一條尾巴，就係當局唔會強制學校實施電子教學，更加未訂推行時間表同細節。

本來呢，資訊科技一日千里，教學電子化無人會反對，但係港府以為咁就可以降低書價，係咪太傻太天真呢？有出版界指出，根據外國經驗，電子書成本遠高於傳統印刷課本，只怕家長未嘗書商減價甜頭，先要硬食電子書費高昂嘅苦果咋！

家長擔挑隨時百上加斤，學生更加可能成為犧牲品。正如教育界擔心，港府嘅教育政策一團糟，若然電子書又搞到甩甩漏漏，唔湯唔水，冇錢買iPad、iPhone同智能電話嘅清貧家庭子女，咪反而被推入一個不公平嘅競賽環境？大家知啦，好心做壞事一向係港府強項，教育界並非杞人憂天o架。

講到呢度，大家或者會問，既然電子書隱憂重重，效益成疑，點解港府又照推可也？唉，講來講去，又要回到教育局逼書商減價一波三折呢筆爛帳。港府當初迫於民情，出手打書商大老虎，依家半天吊騎虎難下，咪惟有重彈電子書舊調，敷衍民意囉。

嗱，咪畀教育界睇死吖，港產官僚嘅教育政策習慣朝令夕改，雷大雨小，電子書嘅命運睇怕亦係九死一生，遲早胎死腹中o架咋，叮！