政壇:九巴新抱征絲路紮住上
有「九巴新抱」之稱嘅Marie利蘊珍近年放下「富二代」標籤,變身「女鐵人」,月前踩單車遠征絲綢之路,花三日完成三百公里。沿途遇上高山症反應同炒車,Marie兩膝嚴重鎅傷,但佢寧願紮住繃帶堅持上路,寫下創舉。佢歷盡艱辛,目的係為自己牽頭成立嘅「運動燃希望基金」籌款,目標籌得一千萬元。
基金今成立,晚上開派對慶祝。Marie話希望透過基金幫助更多有潛質嘅清貧運動員,助他們實現夢想。創舉後,佢左膝仍麻痹不適,但佢已報名參加明年二月舉行嘅渣打馬拉松:「我最憎跑步,但人就係要咁,要勇於挑戰弱點,先會進步。」
利蘊珍(左二)與隊友Annie(左一)、鐵人李致和(中)、Andrea Oschetti(右二)及Samuel(右一)成功征服絲路。(利蘊珍提供)
每天消耗勁多體力,利蘊珍以新疆地道囊餅充飢。
炒車後,利蘊珍僅以繃帶包紮,又再上路。