政壇：立會嘥錢擴建狗窿
添馬艦立法會新大樓面向維港嘅公眾入口通道，一直被批評好似隧道入口或狗窿咁，毫無大體可言。
如果市民由正門進入新大樓，不難發現入咗玻璃門後，就會見到灰蒙蒙一大幅牆，呢幅牆足足有成兩層樓咁高，而喺牆下中間位置，有一個四四方方嘅入口。老實講，身在其中確實有幾分似隧道入口，衰啲講句形容呢個係狗窿亦不為過，以中國人嘅傳統「捐狗窿」無疑係自貶身價，如今立法會整個狗窿畀市民出入新大樓，係咪想貶低廣大市民先？
面對連串批評，立法會行政管理委員會尋日終於有個決定，要求新大樓嘅建築師嚴迅奇搞搞呢個入口。咁即係要改建挖大啲個狗窿喇！至於點搞法？行管會將個波交番畀嚴迅奇，要求重新提交一份設計畀立法會考慮，當中要使幾多錢就仲係未知數。不過，搞親改建，唔使上百萬元都要以十萬元計啦，值唔值真係見仁見智。
設計圖片