政壇：齊推補鑊措施遮醜 四官鬥衰

當大部分市民都認定由煲呔曾領導嘅夕陽政府已收咗工，將焦點放晒喺前日嘅特首選委會選舉同明年嘅特首選舉時，政府尋日突一次過派出四名問責高官，公布合共五項重大政策或消息，令人以為煲呔曾仲好有為。不過只要大家睇真啲，就會發現呢五項全部唔係好嘢，部分仲係為以前做落嘅衰嘢而被迫作出嘅補鑊措施，冇一項係真正嘅新思維或好消息。四名高官專登揀埋喺同一日爆鑊補鑊，好可能只係想藉此互相遮醜。

等市民鬧都鬧唔切

尋日朝早帶頭補鑊嘅，當然就係外號「每周一鑊」嘅食物及衞生局局長周一嶽，今次唔係又有公立醫院派錯藥或醫死人，而係公布針對早前花園街大火作出嘅排檔管理新措施，為旗下嘅食環署管理排檔失職補鑊。

到咗下晝，周一鑊再聯同另外三名高官同事分批補鑊。其中周一鑊正式公布拖咗幾年嘅私營骨灰龕場發牌制度，如果要真正實施到仲要等多幾年；久未露面嘅教育局局長孫明揚，就公布虎頭蛇尾嘅分拆教科書同電子課本措施；之後又輪到政制及內地事務局局長譚志源，公布後知後覺、唔鬧唔做嘢嘅打擊種票建議；到最後壓軸登場嘅係環境局局長邱騰華，公布兩電瘋狂加電費，令小市民生活百上加斤，總之樣樣都唔係好嘢，愈聽就愈火滾。

其實煲呔曾政府過去已多次使出類似陰招，透過一次過公布多項重要政策同消息，希望借某啲好嘢蓋過啲衰嘢。但一次過推出五項衰嘢互相遮醜，等市民同傳媒想鬧都鬧唔切，就真係前所未有，下屆政府千祈唔好學呀！