天橋裂縫不正視 車毀人亡補鑊遲

大家仲記唔記得，今年初本報踢爆東區走廊橋躉移位？出事橋面裂開，支座變形，令人望而生畏，但官僚部門居然死撐係小事。結果揭發原來附近政府工程施工犯錯，導致土壤流失，發現遲啲隨時釀成巨禍，仲話小事喎。

太一叮舊事重提，一來因為劏房火災慘劇不斷上演，令人諗起官僚作風嘅禍害；二來咯喎，因為港人又受到斷橋危機威脅，驚嚇程度同東廊有得揮，叮！

嗱，如果閣下鍾意北上消費，應該對深圳羅湖口岸嗰條行車天橋唔會陌生，甚至留下唔少腳毛添，事關呢條橋係港人搭的士去口岸交通樓嘅必由之路。不過，行車天橋近日驚現一條巨大罅隙，闊到可以將成隻成年人手掌插入去，而裂開嘅石屎欄河亦高低不對稱，其中一邊嘅橋底仲下墜超過一吋添，睇見都牙煙！

一條川流不息嘅行車天橋，搞到好似荷里活災難片嘅巨型道具咁，有乜冬瓜豆腐，唔係講玩o架！塌橋唔使講，平時橋底行人如織，萬一天橋結構受損，早前屯門冧石屎簷篷事故隨時重演都似。唔同嘅係意外地點移師深圳，但深受威脅嘅一樣係香港市民。

斷橋危機當前，如果你問港產官僚，佢哋可能又會答你：小事嚟啫！不過，本港工程師警告，行車天橋下墜一段幾乎壓住橋躉，估計係橋身與橋躉之間嘅「啤令」走位或耗損所致，如果再唔補救，後果可大可小。

港府聽到未呀？斷橋危機不容忽視，唔該快快跟進，同內地部門諗計補鑊。港府對公眾危機一向後知後覺，呢家嘢人所共知，依家傳媒幫手做埋你哋份工，指出斷橋危機，係咪應該即刻做嘢呀？千里之堤，潰於蟻穴，好多車毀人亡慘劇都係由小事引起嘅咋！

可惜吖，言者諄諄，聽者藐藐。太一叮實在好懷疑，港府會唔會聽取忠告。呢，兩個月前，本報又係率先踢爆花園街排檔亂象叢生，火警危機潛伏，點知官僚部門闊佬懶理，當逆耳忠言係耳邊風，結果咪釀成奪命火災慘劇囉。

總而言之，天橋裂縫不正視，車毀人亡補鑊遲。港府高官若然到時先至又出嚟做救災騷，最好戴定消防頭盔，事關你哋實畀人掟蕉o架，叮！